مسجد الاقصی پر ناجائز صہیونی ریاست کا ظالمانہ قبضہ مسلم امہ کا مشترکہ درد

اسلامی جمہوریہ ایران کی مجلس شورائے اسلامی کے اسپیکر نے فلسیطینی سرزمین اور مسجد الاقصی پر ناجائز صہیونی ریاست کے ظالمانہ قبضے کو مسلم امہ کا مشترکہ درد قرار دیتے ہوئے عالم اسلام سے مطالبہ کیا ہے کہ وہ فلسطینی صورتحال پر حساس نوعیت کی بنیاد پر کڑی نظر رکھے.

اسلامی جمہوریہ ایران کی مجلس شورائے اسلامی کے اسپیکر ڈاکٹر علی لاریجانی نے مقبوضہ فلسطین میں نہتے شہریوں پر صہیونیوں کے حالیہ مظالم اور جارحیت کے خلاف اپنے ایک مذمتی بیان میں کہا کہ مسجد الاقصی میں ناجائز صہیونی ریاست کے حالیہ وحشیانہ اقدامات اور چار مظلوم فلسطینی کی شہادت اور 400 سے زائد زخمیی ہونے کی اطلاع نے تمام انسانوں کے دکھ اور درد میں اضافہ کیا ہے.

انہوں نے کہا کہ اسرائیلیوں کے جرائم کا مقصد فلسطین اور قدس شریف کا مکمل قبضہ ہے اور ایسے اقدامات قابض حکومت کے غیرانسانی فطرت کی نشاندہی کرتے ہیں.

ایرانی اسپیکر نے کہا کہ ناجائز صہیونی ریاست کی جانب سے فلسطینی نمازیوں کو مسجدالقصی کے اندر جانے کو روکنے پر مسلم قوموں کے رد عمل نے ثابت کیا کہ فلسطین اور قدس شریف کا دکھ درد تمام اسلامی دنیا کا دکھ درد ہے.

انہوں نے مزید کہا کہ اسلامی دنیا سیاسی تنازعات اور دہشتگردوں کی سازشوں کے باوجود فلسطین کی صورتحال پر شدید رنجیدہ ہے.

واضح رہے کہ ناجائز صہيونی فورسز نے جمعہ کے روز نمازيوں کو مسجدالقصی کے اندر جانے سے روک دیا جس پر ہونے والے احتجاج میں تين مظلوم فلسطينی افراد شہيد ہوگئے.