مجلس خبرگان کی جانب سے آیت اللہ عیسی قاسم کے گھر پر حملے کی مذمت
آیت اللہ شیخ عیسی قاسم کے سلسلے میں بحرینی حکومت کے انسانیت سوز اقدامات نے پوری دنیا کے مسلمانوں اور انسانوں کے دلوں کو مجروح کیا ہے
اسلامی جمہوریہ ایران کی مجتہدین کی کونسل مجلس خبرگان نے بحرین کے بزرگ عالم دین آیت اللہ عیسی قاسم کے گھر پر آل خلیفہ حکومت کے حملے کی مذمت کرتے ہوئے اس گستاخانہ اقدام اور ساتھ ہی عوام پر وحشیانہ مظالم کے نتائج کی بابت بحرینی حکام کو خبردار کیا ہے
شیئرینگ :
اسلامی جمہوریہ ایران کی مجتہدین کی کونسل مجلس خبرگان نے بحرین کے بزرگ عالم دین آیت اللہ عیسی قاسم کے گھر پر آل خلیفہ حکومت کے حملے کی مذمت کرتے ہوئے اس گستاخانہ اقدام اور ساتھ ہی عوام پر وحشیانہ مظالم کے نتائج کی بابت بحرینی حکام کو خبردار کیا ہے
مجلس خبرگان نے ایک بیان جاری کرکے اعلان کیا ہے کہ آل سعود کی پشتپناہی سے آیت اللہ شیخ عیسی قاسم کے سلسلے میں بحرینی حکومت کے انسانیت سوز اقدامات نے پوری دنیا کے مسلمانوں اور انسانوں کے دلوں کو مجروح کیا ہے لیکن آل خلیفہ کو یہ جان لینا چاہئے کہ ان اقدامات کے نتیجے میں ایسا طوفان بپا ہوگا جو اس کی حکومت کو جڑ سے اکھاڑ پھینکے گا - مجلس خبرگان نے اس بیان میں مظلوم قوموں کی حمایت اور ان کے حقوق کے دفاع کو اپنا فریضہ قراردیا اور کہا کہ اسلامی مقدسات پر دشمنوں کے بہیمانہ حملوں اور ان کے تفرقہ انگیز اقدامات کے مقابلے میں اسلامی اتحاد اور بیداری ایک بنیادی اسٹریٹیجی ہے - آل خلیفہ حکومت کی نمائشی عدالت نے گذشتہ اتوار کو آیت اللہ شیخ عیسی قاسم کو ایک سال قید کی سزا اور ان کے اثاثے ضبط کرلینے کا فیصلہ سنایا تھا - نمائشی عدالت کے اس فیصلے اور فیصلے کے خلاف بحرینی عوام کے مظاہروں کے بعد آل خلیفہ حکومت کے فوجیوں اور سیکورٹی اہلکاروں نے سعودی فوجیوں کے ساتھ مل کر منگل کی شام الدراز میں آیت اللہ شیخ عیسی قاسم کے گھر اورگھر کے باہر موجود ان کے حامیوں پر حملہ کردیا جس کے نتیجے میں چھے بحرینی شہری شہید اور دو سو اسّی سے زائد زخمی ہوگئے جبکہ تین سو سے زائد بحرینی شہریوں کو گرفتار کرلیا گیا - دوسری جانب آل خلیفہ حکومت کے ظالمانہ اقدامات کے خلاف بحرینی عوام کے ملک گیر مظاہروں کا سلسلہ جاری ہے - بحرینی شہریوں نے ملک کے مختلف علاقوں میں احتجاجی مظاہرے کرکے آیت اللہ شیخ عیسی قاسم کے گھر اور ان کے حامیوں پر فوجیوں اور سیکورٹی اہلکاروں کے حملوں کی سخت الفاظ میں مذمت کی - خبروں میں بتایا گیا ہے کہ بحرینی فوجیوں نے مظاہرین کو منتشر کرنے کے لئے ان پر طاقت کا بے دریغ استعمال کیا - دریں اثنا ہیومن رائٹس واچ نے اعلان کیا ہے کہ بحرینی حکومت، امریکا کی ایما پر اپنے شہریوں پر حملے کررہی ہے - ہیومن رائٹس واچ کی عاملہ کمیٹی کے سربراہ کینتھ راس نے جمعے کو اپنے ٹوئٹر پیج پر لکھا کہ الدراز میں آیت اللہ شیخ عیسی قاسم کے گھر اور ان کے حامیوں پر آل خلیفہ کے فوجیوں اور سیکورٹی اہلکاروں کے حملے تشویشناک ہیں - انہوں نے اپنے ٹوئٹر پیج پر لکھا کہ بحرینی حکومت کے لئے ٹرمپ کی طرف سے مکمل حمایت کے اعلان کے صرف دو روز بعد ہی آل خلیفہ کے کارندوں نے اپنے شہریوں پر ملکی تاریخ کے بدترین حملے کئے - ایمنسٹی انٹرنیشنل نے بھی اپنی ایک رپورٹ میں اعلان کیا ہے کہ آل خلیفہ کے سیکورٹی اہلکاروں نے منگل کو پرامن مظاہرین پر طاقت کا استعمال کیا ہے -