مسلکی عسکری اتحاد سے کسی خیر کی توقع نہیں

شیعہ علماء کونسل پنجاب کے صدر علامہ سید سبطین سبزواری نے کہا ہے کہ مسلکی عسکری اتحاد سے کسی خیر کی توقع نہیں، ولادت پیغمبر حضرت محمد مصطفیٰ صلی اللہ علیہ وآلہٰ وسلم پر جشن عید میلادالنبی کو بدعت قرار دینے والوں نے ڈونلڈ ٹرمپ کی آمد کا جشن کیسے منا لیا؟

انہوں نے کہا کہ کس اسلام میں نامحرم عورت سے ہاتھ ملانا اور بے پردہ خواتین سے ملاقات جائز ہے، کیا یہ اسلام کی نمائندگی ہے؟ امریکہ کے ساتھ جو معاہدے کئے جا رہے ہیں، ان کی تفصیلات اور ہدف منظر عام پر آنا چاہیے، ہر جگہ پر مسلمانوں کو نقصان پہنچانے والا امریکہ شاہی خاندان کا محافظ کیسے بن گیا؟

علامہ سبطین سبزواری نے کہا کہ عالمی حالات کا تقاضاہے کہ مسلمانوں کے درمیان اتحاد و وحدت کو فروغ دیا جائے۔ انہوں نے کہا کہ امریکی صدر کے دورے سے عالمی مسلکی اتحاد بے نقاب ہوگیا ہے، جس کا مقصد صرف اور صرف امریکی مفادات کا تحفظ اور غاصب اسرائیل کا دفاع ہے، جس کے فلسطینیوں کے خون میں ہاتھ رنگے ہوئے ہیں۔

ان کا کہنا تھا کہ جس انداز کا پروٹوکول ڈونلڈ ٹرمپ کو دیا گیا ہے، اس سے اندازہ ہو گیا ہے کہ عسکری اتحاد کے مقاصد کیا ہیں؟ علامہ سبطین سبزواری نے کہا کہ سعودی عرب کی مسلم امہ میں اہمیت ہے اور وہ مسلمانوں کے مقدس ترین مقامات حرمین شریفین کے محافظ ہونے کے دعویدار بھی ہیں، شاہی خاندان کی ڈونلڈ ٹرمپ کی بیوی اور بیٹی کیساتھ تصاویر اور شاہ سلمان کا نامحرم عورت سے مصافحہ کس اسلام کی نمائندگی ہے؟