تین باخبر ذرائع نے رائٹرز کو بتایا کہ ایران کے بعد سعودی عرب شام کے ساتھ دوبارہ تعلقات استوار کرنے کی طرف بڑھ رہا ہے۔

اس معاملے سے واقف تین ذرائع نے بتایا کہ شام اور سعودی عرب نے ایک دہائی سے زیادہ عرصہ قبل سفارتی تعلقات منقطع کرنے کے بعد اپنے سفارت خانے دوبارہ کھولنے پر اتفاق کیا ہے، یہ ایک ایسا قدم ہے جو عرب دنیا میں دمشق کی موجودگی میں نمایاں توسیع کی نشاندہی کرتا ہے۔

دمشق سے منسلک ایک علاقائی ذریعے نے بتایا کہ بشار الاسد کے اہم اتحادی سعودی عرب اور ایران کے درمیان تعلقات کی بحالی کے لیے تاریخی معاہدے کے بعد ریاض اور دمشق کے درمیان رابطوں میں تیزی آئی ہے۔

ریاض اور دمشق کے درمیان تعلقات کا دوبارہ قیام بشار اسد کے ساتھ تعلقات کو معمول پر لانے کے لیے عرب ممالک کی کوششوں میں سب سے اہم پیشرفت ہے، جسے بہت سے مغربی اور عرب ممالک نے 2011 میں شام کی خانہ جنگی کے آغاز کے بعد ترک کر دیا تھا۔

دمشق کے ساتھ منسلک ایک دوسرے علاقائی ذریعہ نے رائٹرز کو بتایا کہ دونوں حکومتیں عید الفطر کے بعد سفارتخانے دوبارہ کھولنے کی تیاری کر رہی ہیں۔

ایک علاقائی ذریعے اور خلیج فارس کے ایک سفارت کار کے مطابق یہ فیصلہ شام کے انٹیلی جنس کے ایک اعلیٰ اہلکار کے ساتھ سعودی عرب میں ہونے والی بات چیت کا نتیجہ ہے۔

خلیج فارس کے اس سفارت کار نے نوٹ کیا کہ شامی انٹیلی جنس کے اعلیٰ عہدے دار سفارت خانوں کو جلد کھولنے کے معاہدے پر پہنچنے کے لیے " دنوں تک" ریاض میں رہے۔

سعودی عرب کے سرکاری مواصلاتی دفتر، سعودی وزارت خارجہ اور شامی حکومت نے تبصرہ کرنے کے لیے رائٹرز کی درخواستوں کا جواب نہیں دیا۔ ان ذرائع نے بھی معاملے کی حساسیت کے پیش نظر نام ظاہر نہ کرنے کی شرط پر بات کی۔

اچانک ہونے والی پیش رفت سے ظاہر ہوتا ہے کہ تہران اور ریاض کے درمیان معاہدہ کس طرح خطے کے دیگر بحرانوں کو ختم کر سکتا ہے۔

دریں اثنا، امریکہ اب بھی شام اور اسد حکومت کے ساتھ خطے کے ممالک کے درمیان تعلقات کو معمول پر لانے کے خلاف ہے۔