ایرانی وزارت خارجہ کے ترجمان نے عرب لیگ کے تازہ بیان پر افسوس کا اظہار کرتے ہوئے اسے بے بنیاد دعووں کی تکرار قرار دیا ہے۔

یہ بات ناصر کنعانی نے اتوار کے روز سعودی عرب کے شہر جدہ میں عرب لیگ کے ارکان کے 32ویں اجلاس کے دوران جاری کیے گئے حالیہ بیان کے جواب میں کہی۔

انہوں نے کہا کہ ایسا دعویٰ بے نتیجہ ماضی کے راستے پر گامزن ہے۔

کنعانی نے اس بات پر زور دیا کہ عرب لیگ سے توقع کی جاتی ہے کہ وہ بے بنیاد دعووں کو دہرانے کے بجائے امن و استحکام کو یقینی بنانے کے لیے مثبت اور تعمیری قدم اٹھائے گی۔

انہوں نے تعاون کو مضبوط بنانے اور باہمی افہام و تفہیم کو ترجیح دینے کے لیے بعض علاقائی ممالک کی جانب سے اپنائے جانے والے تعمیری نقطہ نظر کا خیرمقدم کیا۔

انہوں نے کہا کہ اسلامی جمہوریہ ایران نے ہمیشہ خطے میں جامع تعاون کی اہمیت پر زور دیا ہے۔

ایرانی محکمہ خارجہ کے ترجمان نے اپنے تبصرے کے آخر میں اس بات پر زور دیا کہ ابو موسی، بڑے تنب اور چھوٹے تنب کے تین جزیرے ایران کے ہیں اور ان کے بارے میں کوئی بھی دعویٰ مسترد ہے۔