لبنان کی وزارت خارجہ نے جمعرات کی شب ایک بیان میں اس ملک کے جنوب میں اسرائیلی توپ خانے کے حملے کی مذمت کی ہے۔

لبنان کی وزارت خارجہ نے ملک کے جنوب میں واقع کفر شوبا کے علاقے پر اسرائیلی توپ خانے کے حملے کی مذمت کرتے ہوئے اسے لبنان کی خودمختاری پر حملہ قرار دیا ہے۔

لبنان کی وزارت خارجہ کے بیان میں کہا گیا ہے: لبنان کی سرزمین پر صیہونی حکومت کا حملہ اقوام متحدہ کی سلامتی کونسل کی قرارداد 1701 کی خلاف ورزی اور لبنان کی خودمختاری پر حملہ ہے۔

اس وزارت نے اپنے بیان میں اقوام متحدہ اور عالمی برادری سے کہا ہے کہ وہ اسرائیلی حکومت پر دباؤ ڈالے کہ وہ لبنان کی سرزمین، فضائی حدود اور علاقائی پانیوں کے خلاف مسلسل جارحیت بند کرے۔

آخر میں لبنان کی وزارت خارجہ نے تمام بین الاقوامی قراردادوں کے احترام کا مطالبہ کیا اور صیہونی حکومت کے فوری اور غیر مشروط ان تمام لبنانی سرزمینوں سے انخلاء پر تاکید کی جو اس حکومت کے قبضے میں ہیں۔

جمعرات کی صبح جنوبی لبنان کے سرحدی گاؤں کفرشوبا کے ارد گرد دو دھماکوں کی آواز سنی گئی۔

صہیونی فوج نے دعویٰ کیا ہے کہ ایک راکٹ لبنان سے داغا گیا اور لبنان اور مقبوضہ فلسطین کی سرحد کے قریب پھٹ گیا۔

اسی دوران اسرائیلی میڈیا نے بتایا کہ اسرائیلی فوج نے کفر شوبہ کے قریب حرجیہ کے علاقے میں توپ خانے کے 15 گولے داغے۔

لبنان کی حزب اللہ نے جمعرات کے روز ایک بیان میں اعلان کیا ہے کہ گجر گاؤں میں صہیونی دشمن کی خطرناک کارروائیاں مکمل طور پر غاصبانہ قبضے کے مترادف ہیں اور یہ تحریک لبنان کے تمام اداروں بالخصوص حکومت اور لبنانی قوم کے مختلف طبقات سے مطالبہ کرتی ہے کہ وہ غاصب صیہونی حکومت کے قیام کو روکیں۔ اس قبضے اور جارحانہ اقدامات کو منسوخ کرکے ملک کے اس حصے کو آزاد کرانے کی کوشش کریں۔