شام کی وزارت خارجہ نے ایک بیان میں مقبوضہ گولان کی پہاڑیوں کے علاقے "مجدل شمس" پر حملے کو صیہونی حکومت کی جانب سے اس علاقے میں اپنی جارحیت کے دائرہ کار کو بڑھانے کا جواز فراہم کرنے کی کارروائی قرار دیا ہے۔

شام کی وزارت خارجہ کے بیان میں کہا گیا ہے: "گزشتہ روز، غاصب اسرائیل نے مجدل شمس میں ایک گھناؤنا جرم کیا اور پھر اس جرم کا ذمہ دار لبنان کی قومی مزاحمت کو ٹھہرایا۔"

شام کی وزارت خارجہ نے مزید کہا: "یہ جرم اس تناظر میں ہے کہ قابض حکومت علاقے میں حالات کو مزید خراب کرنے اور اس میں اپنی جارحیت کا دائرہ وسیع کرنے کی کوشش کر رہی ہے، اور ہم اس حکومت کی جانب سے اپنی جارحیت کا دائرہ بڑھانے کے بہانے بنانے کی کوششوں کی مذمت کرتے ہیں۔ اور اسے خطرناک حد تک بڑھنے کا ذمہ دار ٹھہراتے ہیں، ہم خطے کی صورتحال کو جانتے ہیں۔"

اس بیان کے تسلسل میں مزید کہا گیا ہے: "مقبوضہ شامی گولان میں ہمارے لوگ جنہوں نے اپنی "عرب شامی" شناخت کو ترک کرنے سے انکار کر دیا، قابضین کے جھوٹ اور قابضین کے جھوٹے الزامات کے دھوکے میں نہیں آئیں گے۔

شام کی وزارت خارجہ نے بھی تاکید کی: شامی گولان میں ہمارے لوگ غاصب حکومت اور اس کی جارحانہ پالیسیوں کے خلاف مزاحمت کا لازمی حصہ رہے ہیں، ہیں اور رہیں گے۔

یہ بیان ہفتے کی شام مقبوضہ گولان کی پہاڑیوں کے علاقے مجدل شمس کو میزائل سے نشانہ بنائے جانے کے بعد جاری کیا گیا۔ اس حملے میں 12 افراد ہلاک اور متعدد زخمی ہوئے۔

اس حملے کے بعد صیہونی حکومت کے ذرائع ابلاغ اور حکام نے لبنانی حزب اللہ کو مرتکب کے طور پر شناخت کیا لیکن حزب اللہ نے ایک بیان میں اعلان کیا کہ اس کا مجدل شمس کے حملے سے کوئی تعلق نہیں ہے۔

بعض میڈیا ذرائع نے یہ بھی انکشاف کیا ہے کہ مقبوضہ گولان میں مجدل شمس کے حادثے کی وجہ صیہونی حکومت کا طیارہ شکن میزائل تھا جو فٹبال اسٹیڈیم سے ٹکرا گیا۔