پاکستان سمیت دنیا بھر کی مسیحی برادری آج کرسمس کا تہوار منارہی ہے، ملک بھر کے گرجا گھروں میں دعائیہ تقریبات منعقد کی جارہی ہیں اور گھروں اور محلوں کو خوبصورتی سے سجایا گیا ہے۔

حضرت عیسیٰ علیہ السلام کے یوم پیدائش کے موقع پر ملک بھر کے گرجا گھروں میں دعائیہ تقریبات منعقد کی گئیں، جس میں ملکی سلامتی کے لیے خصوصی دعائیں کی گئیں اور گیت گائے گئے۔

کرسمس کے موقع پر مسیحی برادری نے گلیاں اور محلے کرسمس ٹریز اور چراغاں کرکے خوبصورتی سے سجا دیے، اس موقع پر سیکیورٹی کے خصوصی انتظامات کیے گئے ہیں۔
ڈی جی رینجرز سندھ نے رات گئے کراچی کے مختلف علاقوں کا دورہ کیا اور گرجا گھروں کی سیکیورٹی انتظامات کا خصوصی جائزہ لیا۔

پاکستان کے صدر آصف علی زرداری اور وزیراعظم شہباز شریف کی جانب سے مسیحی برادری کو کرسمس کی مبارکباد پیش کی گئی ہے۔

صدر آصف علی زرداری نے کہا ہے کہ پاکستان اور دنیا بھر کی مسیحی برادری کو کرسمس کی دلی مبارکباد پیش کرتا ہوں، کرسمس انسانیت کے لیے ایک آفاقی پیغام لاتی ہے۔ انہوں نے کہا کہ کرسمس محبت، سخاوت، رحم، اتحاد اور امید کی ترغیب دیتی ہے۔

وزیر اعظم شہباز شریف نے کہا کہ کرسمس تمام انسانیت کے لیے امن، بھائی چارے اور محبت کا پیغام ہے اور ملکی ترقی خوشحالی خاص طور پر تعلیم، صحت اور قوم کی تعمیر کے شعبوں میں مسیحی برادری کا کردار مثالی ہے۔

ان کا کہنا تھا کہ حکومت تمام مذہبی برادریوں کے حقوق کے تحفظ اور احترام کو فروغ دینے کے لیے پر عزم ہے۔