ایک نجی ٹی وی کے پروگرام میں گفتگو کرتے ہوئے چیئرمین پاکستان علماء کونسل کا کہنا تھا کہ بی بی زینب کے روضہ پر حملہ کی جتنی مذمت کی جائے کم ہے۔ روز محشر اگر بی بی زینب نے اپنے نانا سے گلہ کیا تو ہم رسول اللہ (ص) کو کیا منہ دکھائیں گے۔

تقریب نیوز (تنا): چیئرمین پاکستان علماء کونسل علامہ طاہر اشرفی نے بی بی زینب (س) کے روضہ مبارک پر حملہ کی مذمت کرتے ہوئے کہا ہے کہ مساجد اور مزارات پر حملے کرنے والوں کے حق میں صفائیاں پیش کرنے والے ظلم عظیم کر رہے ہیں۔ ان خیالات کا اظہار انہوں نے ایک نجی ٹی وی چینل سماء نیوز کے پروگرام میں ٹیلی فونک گفتگو کرتے ہوئے کیا۔ 

ان کا کہنا تھا کہ بی بی زینب کے مزار پر دہشتگردوں کا حملہ انتہائی قابل مذمت ہے، ہونا تو یہ چاہئے تھا کہ آج کا دن اس حوالے سے مختص کیا جاتا اور اس حملہ کی شدید الفاظ میں مذمت کی جاتی۔ 

انہوں نے کہا کہ مساجد اور مزارات پر حملے کرنا دہشتگردی ہے، اور جو لوگ ایسا کرنے والوں کے حق میں صفائیاں پیش کرتے ہیں وہ ظلم عظیم کرتے ہیں۔ ان کا کہنا تھا کہ بی بی زینب کے روضہ پر حملہ کی جتنی مذمت کی جائے کم ہے۔ روز محشر اگر بی بی زینب نے اپنے نانا سے گلہ کیا تو ہم رسول اللہ (ص) کو کیا منہ دکھائیں گے۔