تقریب نیوز (تنا): حضرت سلمان فارسی کے موضوع پر منعقدہ درسی نشست سے خطاب کرتے ہوئے مجلس وحدت مسلمین بلوچستان کے سربراہ مولانا مقصود علی ڈومکی نے کہا کہ صحابہ کرام نے دین اسلام کی سربلندی کے لئے عظیم جدوجہد کی۔ رسول اکرم (ص) نے ارشاد فرمایا کہ "سلمان ہمارے اہلبیت میں سے ہیں"۔ آپ دسویں درجہ پر فائز تھے اور صاحبِ کرامت بزرگ اصحاب میں آپ کا شمار ہوتا ہے۔

انہوں نے کہا کہ غلامانِ امریکہ مسلمانوں کے درمیان اختلاف اور انتشار کو ہوا دے رہے ہیں، جس کا مقصد سامراجی عزائم کی تکمیل ہے۔ سامراجی قوتیں مسلمانوں کے اتحاد سے خائف ہیں۔ شیعہ سنی مسلمان اس خطے میں صدیوں سے آباد ہیں اور اتحاد و وحدت سے رہ رہے ہیں۔ آج بھی پاکستان میں دو بڑے دینی اتحاد ایم ایم اے اور ملی یکجہتی کونسل موجود ہیں۔ جہاں شیعہ سنی مسلمان متحد ہیں۔ جبکہ ان اتحادیوں میں فرقہ پرست عناصر کےلئے کوئی جگہ نہیں۔

مولانا مقصود ڈومکی نے کہا کہ بلوچستان میں اتحاد ملت اسلامیہ محاذ کے نام سے شیعہ سنی، دیوبندی، بریلوی اور اہلحدیث کے اکابرین، علماء اتحاد و وحدت کی عملی تصویر ہیں۔