قطر کے وزیر اعظم عبدالرحمٰن آل ثانی نے اتوار کو کہا ہے کہ اسرائیل کی بمباری کے باوجود غزہ میں نئی فائر بندی اور حماس کے پاس موجود مزید قیدیوں کی رہائی کے لیے ثالثی کی کوششیں جاری ہیں۔

فرانسیسی خبر رساں ادارے اے ایف پی کے مطابق قطر کے وزیر اعظم کا کہنا ہے کہ اسرائیل کی طرف سے بمباری جاری رکھنےکی وجہ سے کامیاب نتیجے کی ’کھڑکی تنگ ہوتی جا رہی ہے۔

دوحہ فورم سے خطاب میں عبدالرحمٰن آل ثانی نے کہا: ’ قطر کی ریاست کی حیثیت سے ہماری کوششیں اپنے شراکت داروں کے ساتھ مل کر جاری ہیں۔ بمباری کا تسلسل ہمارے لئے اس کھڑکی کو صرف تنگ کر رہا ہے۔

قطر کے وزیر اعظم نے مزید کہا کہ ’ ہماری کوششیں جاری ہیں۔ ہم قیدیوں کی رہائی کے لیے پرعزم ہیں لیکن ہم جارحیت رکوانے کے لیے بھی پرعزم ہیں لیکن ہمیں دونوں فریقوں کی طرف سے ایک جیسی آمادگی نظر نہیں آ رہی۔