شام میں اچانک حالات بگڑنے کے بعد وہاں پھنسے پاکستانیوں کے انخلاء کے لئے مجلسِ وحدت مسلمین پاکستان کے پارلیمانی لیڈر ممبر قومی اسمبلی انجینئر حمید حسین نے ترجمان دفترِ خارجہ محترمہ ممتاز زہراء بلوچ سے ملاقات کی ہے۔

ملاقات میں شام کی حالیہ کشیدہ صورتحال پر تبادلہ خیال کیا گیا ہے۔

ایم ڈبلیو ایم پاکستان کے رہنما انجینئر حمید حسین نے شام کے موجودہ اور غیر یقینی حالات کے پیشِ نظر، وہاں پر محصور 300 زائرین کی مشکلات اور مسائل کے بارے میں ترجمان دفترِ خارجہ کو آگاہ کیا۔

اس موقع پر زائرین سمیت 1200 پاکستانیوں کی فوری اور بحفاظت وطن واپسی کے حوالے سے بھی بات چیت کی گئی۔

ترجمان دفترِ خارجہ پاکستان محترمہ ممتاز زہراء بلوچ نے کہا کہ دمشق میں پاکستانی سفارت خانہ متحرک ہے اور اس حوالے سے محصور پاکستانیوں کی محفوظ وطن واپسی کے لیے فوری اقدامات کیے جا رہے ہیں۔