اسرائیل کا حماس کے ٹاپ تھری میں شامل رہنما مروان عیسیٰ کو شہید کرنے کا دعویٰ

 لبنان کے بیروت میں ایک ڈرون حملے میں حماس کے عسکری ونگ کے بانی صالح عروری کو شہید کرنے کے بعد اب اسرائیل نے حماس کے ٹاپ تھری میں شامل رہنما مروان عیسیٰ کو شہید کرنے کا دعویٰ کیا ہے۔ تاہم حماس نے اسرائیل کے دعویٰ کو جنگی حکمت عملی قرار دیا ہے۔

اسرائیل کی فوج کا کہنا ہے کہ اس نے اس بات کی تصدیق کی ہے کہ اس ماہ کے شروع میں ایک فضائی حملے میں غزہ میں حماس کے مسلح ونگ کے نائب رہنما مروان عیسیٰ شہید ہوئے ہیں۔ اسرائیل کا الزام ہے کہ مروان عیسیٰ نے 7 اکتوبر کے حملے کی منصوبہ بندی میں مدد کی تھی۔

عیسیٰ حماس کے اعلیٰ ترین رہنما ہیں جو جنگ کے آغاز کے بعد سے غزہ میں مارے گئے ہیں۔ اسرائیل نے گذشتہ برسوں میں حماس کے کئی سرکردہ رہنماؤں کو ہلاک کیا ہے۔ لیکن ان ہلاکتوں کے باوجود حماس کی کارروائیوں پر کوئی واضح اثر نہیں پڑا ہے۔

اسرائیلی فوج کے ترجمان ریئر ایڈمرل ڈینیئل ہگاری نے منگل کو بتایا کہ انٹیلی جنس نے تصدیق کی ہے کہ عیسیٰ اس وقت مارا گیا جب لڑاکا طیاروں نے 9 اور 10 مارچ کے درمیان وسطی غزہ میں ایک زیر زمین کمپاؤنڈ کو نشانہ بنایا تھا۔ اسرائیل کے مطابق ایسا خیال کیا جاتا ہے کہ اس زیر زمین کمپاؤنڈ میں عیسیٰ اور حماس کے ایک اور کمانڈر عزیز ابو تما موجود تھے۔

حماس کے عہدیدار عزت الرشیق نے کہا کہ اسرائیلی اعلان کا مقصد غزہ میں اپنے جنگی اہداف حاصل کرنے میں فوج کی ناکامی سے توجہ ہٹانا ہے۔ آن لائن جاری کردہ ایک بیان میں انہوں نے کہا کہ قتل کے بارے میں اسرائیل کا بیانیہ قابل اعتبار نہیں ہے۔

انہوں نے حماس کے مسلح ونگ کا حوالہ دیتے ہوئے کہا کہ اس ضمن میں حتمی تصدیق القسام بریگیڈ کرے گا۔"

عیسیٰ، 1965 میں پیدا ہوئے، حماس کے عسکری ونگ کے طویل عرصے سے سایہ دار رہنما محمد دیف کے نائب تھے، جن کے بارے میں کہا جاتا ہے کہ وہ کئی مرتبہ اسرائیلی حملوں کو ناکام بناتے ہوئے بچنے میں کامیاب ہوئے تھے۔

یحییٰ سنوار غزہ میں حماس کے سرکردہ رہنما اور 7 اکتوبر کے حملے کے مبینہ ماسٹر مائنڈ ہیں۔ انھوں نے 2011 میں ایک اسرائیلی فوجی کے بدلے 1,000 سے زیادہ فلسطینی قیدیوں کی رہائی کو ممکن بنایا تھا۔ سنوار دو دہائیوں سے زیادہ وقت اسرائیلی جیلوں میں گزار چکے ہیں۔

بغیر کوئی ثبوت پیش کیے اسرائیل دعویٰ کرتا آیا ہے کہ، اس نے جنگ کے آغاز سے لے کر اب تک حماس کے 13,000 جنگجوؤں کو ہلاک کیا ہے، اور دعویٰ کیا ہے کہ اس نے شمالی غزہ میں اس گروپ کو بڑی حد تک ختم کر دیا ہے۔ لیکن حماس نے علاقے کے تمام حصوں میں اسرائیلی فوجیوں پر حملے جاری رکھے ہوئے ہیں۔