مودی حکومت کے غیرذمہ دارانہ رویہ کی ملک کو بہت بھاری قیمت چکانی پڑے گی

ہندوستان میں اپوزیشن رہنما نے کورونا کے تعلق سے حکومتی پالیسیوں پر سخت تنقید کرتے ہوئے کہا کہ اس کے غیر ذمہ دارانہ رویہ کی ملک کو بہت بھاری قیمت چکانی پڑے گی۔
ہندوستان کی خبررساں ایجنسی (یواین آئی) کے مطابق کورونا وائرس میں مسلسل اضافہ پر نریندر مودی حکومت کو نشانہ بناتے ہوئے کانگریس کے رہنما راہل گاندھی نے کہا ہے کہ فیصلہ کن اور موثر اقدام کرنے میں حکومت کی نااہلی کی ملک کو بہت بھاری قیمت چکانی پڑے گی۔
راہل گاندھی نے ٹویٹ کرتے ہوئے کہا کہ کورونا وائرس کے بھیانک خطرے سے نمٹنے کے لیے فوری اور جنگی پیمانے پر کارروائی ضروری ہے ورنہ ہندوستان کو بہت بھاری قیمت ادا کرنی پڑ سکتی ہے ۔
کانگریس کے رہنما کا یہ بیان ایسے وقت میں سامنے آیا ہے جب ہندوستان میں اس وائرس میں مبتلا مریضوں کی تعداد بڑھ کر ایک سو اکیاون ہوگئی ہے جن میں پچیس غیر ملکی ہیں اور تین لوگوں کی دہلی، مہاراشٹر اور کرناٹک میں موت بھی ہو چکی ہے ۔
منگل کے روز راہل گاندھی نے کہا تھا کہ ہندوستان کو صرف کورونا وائرس کے لیے ہی نہیں بلکہ آنے والی بھیانک معاشی تباہی کے لیے بھی تیار رہنا چاہئے ۔
راہل گاندھی نے پارلیمنٹ کے باہر نامہ نگاروں سے بات چیت کرتے ہوئے کہاتھا کہ مجھے یہ کہتے ہوئے بہت افسوس ہو رہا ہے کہ ہمارے عوام کو آئندہ چھ ماہ میں جن مصائب کا سامنا کرنا پڑ سکتا ہے اس کا تصور بھی نہیں کیا جاسکتا۔