ایرانی وزیر خارجہ اور روسی وزیر خارجہ کے درمیان ٹیلی فون رابطہ

روسی وزیر خارجہ نے ایران اور سعودی عرب کے درمیان معاہدے کا خیر مقدم کیا۔

یہ بات سرگئی لاوروف نے گزشتہ روز ایرانی ہم منصب کے ساتھ ایک فون کال میں گفتگو کرتے ہوئے کہی۔

اس ٹیلی فونک گفتگو میں روسی وزیر خارجہ نے اسلامی جمہوریہ ایران اور سعودی عرب کے درمیان سفارتی تعلقات کی بحالی کے معاہدے کا خیر مقدم کیا اور فریقین نے طویل مدتی تعاون کے جامع معاہدے کے حوالے سے اپنے تازہ ترین خیالات پر گفتگو کی۔

اسلامی جمہوریہ ایران اور روس کے وزرائے خارجہ نے شام اور ترکی کے درمیان مسائل کے حل کے لیے چار فریقی اجلاس (ایران، روس، ترکی اور شام) کے انعقاد کے حوالے سے بھی تبادلہ خیال کیا۔

ایرانی وزیر خارجہ نے یوکرائنی بحران کے حوالے سے کہا کہ ایران کا اصولی موقف سیاسی حل اور بات چیت پر توجہ مرکوز کرنا ہے۔

فریقین نے ایران اور عالمی ایٹمی توانائی ایجنسی کے درمیان تکنیکی تعاون پر تبادلہ خیال کیا۔