حشد الشعبی کا بعقوبہ کے شمال میں داعش دہشتگردوں کے خلاف کامیاب آپریشن

بعقوبہ کے شمال میں ہونے والے آپریشن کے دوران دہشت گرد تنظیم داعش کے درجنوں کارکنوں کو موت کے گھاٹ اتار دیا گیا، حشد الشعبی کے کماندڑ کا دعوی

عراقی عوامی رضاکار فورس حشد الشعبی کے کمانڈر بشیر العنبکی نے کہا ہے کہ بعقوبہ کے شمال میں واقع قصبے خانقین میں آپریشن کے دوران دہشت گرد تنظیم داعش کے درجنوں کارکنوں کو قتل کیا گیا ہے۔

انہوں نے کہا کہ قابل اعتماد ذرائع سے اطلاعات موصول ہونے کے بعد یہ آپریشن کیا گیا جس کے نتیجے میں دہشت گردوں کو شدید نقصان پہنچایا گیا ہے۔

العنبکی نے واضح کیا کہ خانقین اور اس کے گرد و نواح کے قصبوں میں اس سے پہلے اس نوعیت کا آپریشن نہیں کیا گیا تھا۔ حشد الشعبی کے فورسز نے اربعین حسینی میں شرکت کرکے واپس جانے والے زائرین کی حفاظت کو یقینی بنانے میں اہم کردار ادا کیا ہے۔

حشد الشعبی کے چھے یونٹ پہلے ہی صوبہ دیالی کے مختلف مقامات پر متعین ہیں۔ المعلومہ سے گفتگو کرتے ہوئے حشد الشعبی کے کمانڈر محمد التمیمی نے کہا کہ صوبے کے مختلف راستوں پر چیکنگ کا نظام سخت بنایا گیا ہے۔ حشد الشعبی کی بحری فورسز بحری راستوں سے داعش کے لئے امدادی راستہ کاٹنے کی کوشش کررہی ہیں۔ 

یاد رہے کہ حشد الشعبی کی بحری فوج کئی سالوں سے حمرین سمیت دیگر دریائی راستوں کی حفاظت کے لئے بھرپور کردار ادا کررہی ہے۔