عمران خان: بیرون ملک پاکستانی ترسیلات زر کا بائیکاٹ کریں

سابق وزیراعظم اور پاکستان تحریک انصاف (پی ٹی آئی) کے بانی عمران خان نے نظربندی کی ڈیل مسترد کرتے ہوئے بیرون ملک مقیم پاکستانیوں سے مطالبہ کیا ہے کہ وہ ترسیلات زر کا بائیکاٹ کریں اور ملک کی حقیقی آزادی جمہوریت کی بحالی میں اپنا کردار ادا کریں۔

عرب نیوز کی رپورٹ کے مطابق اڈیالہ جیل میں قید بانی پی ٹی آئی عمران خان نے جیل سے نکال کر گھر میں نظربند رکھنے کی ڈیل مسترد کردی ہے۔

رپورٹ میں بتایا گیا کہ عمران خان نے سماجی رابطے کی ویب سائٹ پر ایک پوسٹ میں دعویٰ کیا کہ حکومت کے ساتھ مذاکرات اور ان کی جماعت کو سیاسی مواقع فراہم کرنے کے لیے انہیں ڈیل کی پیش کش کی گئی تھی جس کے تحت انہیں بنی گالہ میں واقع رہائش باہ میں نظر بند رکھنے کی پیشکش کی گئی تھی لیکن انہوں نے اسے مسترد کردیا۔

عمران خان نے اس طرح کی ڈیل قبول کرنے کے بجائے جیل میں رہنے کو ترجیح دیتے ہوئے اصرار کیا ہے کہ پی ٹی آئی کے تمام قیدیوں کو رہا کیا جائے۔

انہوں نے کہا کہ ترسیلات زر کا بائیکاٹ اس وقت تک کیا جائے جب تک حکومت ان کے مطالبات پورے کرنے کے لیے معنی خیز اقدامات نہیں کرتی تاہم انہوں نے عندیہ دیا کہ اگر مذاکرات کے نتائج مثبت نکلے تو اس مہم کو ترک کردیا جاسکتا ہے۔

عمران خان نے اپنے بیان میں 9 مئی کے واقعات سے جڑے پی ٹی آئی کے کارکنوں کے فوجی عدالتوں میں ٹرائل پر بھی تنقید کی اور اس سے شفافیت اور شہری حقوق کی خلاف ورزی قرار دیتے ہوئے مذمت کی۔

انہوں نے کہا کہ ٹرائل کھلی عدالت میں ویڈیو ثبوت کے ساتھ ہونا چاہیے، جس کا تقاضا پاکستان کا آئین کرتا ہے۔

خیال رہے کہ حکومت اور پی ٹی آئی کے درمیان سیاسی کشیدگی کم کرنے کے لیے مذاکرات باقاعدہ طور پر شروع ہوچکے ہیں اور اس کا پہلا دور بھی منعقد ہوچکا ہے۔