سیستان بلوچستان: دہشتگردانہ حملے میں 8 پاکستانی جاں بحق

ایران کے مشرقی صوبے سیستان بلوچستان میں ایک مسلح حملے میں کم از کم 8 پاکستانی شہری جاں بحق ہو گئے۔

پاک-ایران بارڈر کے قریب ایرانی سیستان بلوچستان صوبے میں ان پاکستانیوں کو نشانہ بنایا گیا۔

ذرائع کے مطابق جاں بحق ہونے والے پاکستانیوں کا تعلق بہاولپور کے علاقے سے ہے۔

ذرائع نے بتایا کہ قتل ہونے والے پاکستانیوں کو مبینہ طور پر ایک پاکستان مخالف دہشت گرد تنظیم کی جانب سے نشانہ بنایا گیا، پاکستانی سفارت خانہ کے حکام مزید تفصیلات حاصل کر رہے ہیں۔

ذرائع کے مطابق دور دراز علاقے کی وجہ سے ابھی ایرانی حکام نے کچھ نہیں بتایا، پاکستانی سفارتخانے کے افسران کو جائے وقوعہ کی جانب روانہ کر دیا گیا۔

ذرائع نے بتایا کہ لاشوں کی تصدیق اور شناخت کا عمل جاری ہے، ابتدائی اطلاعات کے مطابق یہ پاکستانی موٹر مکینک تھے۔

واضح رہے ایران اور پاکستان کے سرحدی علاقے میں تکفیری دہشتگردوں کی انتہاپسنداہ سرگرمیوں کی وجہ سے آئے دن افسوسناک واقعات جنم لیتے ہیں جو دونوں ممالک کے لئے تشویش کا باعث ہیں۔ 

ان مسائل کے سدباب کے لئے دونوں حکومتیں وقتا فوقتا دہشتگردوں کے خلاف آپریشن کرتی نظر آتی ہیں۔