مشترکہ مفادات خصوصا علاقائی امن و خوشحالی کے حصول میں تہران اور اسلام آباد کا کردار بہت اہم ہے

 پاکستان کی سینیٹ کے چیئرمین محمد صادق سنجرانی نے بین الاقوامی فورمز میں اسلامی جمہوریہ ایران کے تعاون پراطمینان کا اظہارکرتے ہوئے کہا: مشترکہ مفادات خصوصا علاقائی امن و خوشحالی کے حصول میں تہران اور اسلام آباد کا کردار بہت اہم ہے .

محمد صادق سنجرانی نے پاکستان میں ایران کے سفیر رضا امیری مقدم سے ملاقات میں دونوں ممالک کے درمیان تعلقات اور ہمہ جہتی تعاون کے فروغ پر زور دیا۔

محمد صادق سنجرانی نے علاقائی امن و خوشحالی کے لیے تہران اور اسلام آباد کے درمیان تعلقات کی اہمیت کے حوالے سے تاکید کرتے ہوئے کہا کہ ہم ایران کےساتھ سیاسی، سماجی اور اقتصادی شعبوں میں تعاون کو مزید مضبوط بنانے کے خواہاں ہیں۔

انہوں نے پاک ایران گیس پائپ لائن منصوبے پر ایران کے موقف کو سراہتے ہوئے کہا کہ یہ منصوبہ بلوچستان کے لوگوں کی توانائی کی ضروریات کو پورا کرنے میں مدد فراہم کریگا۔

 فریقین نے باہمی تجارتی اور اقتصادی تعلقات میں تازہ ترین پیشرفت ، ٹرانزٹ کے کلیئرنگ میکنزم کو فعال کرنے اور مشترکہ سرحدوں کی حفاظت کے نظام کو مضبوط بنانے کی کوششوں پر بھی تبادلہ خیال کیا۔