ملائیشیا: سابق وزیر اعظم عبداللہ احمد بداوی انتقال کر گئے

ملائیشیا کے سابق وزیر اعظم عبداللہ احمد بداوی 85 برس کی عمر میں انتقال کر گئے۔

تفصیلات کے مطابق عبداللہ احمد بداوی 2003 میں 22 سالہ اقتدار کے بعد مہاتیر محمد کے وزارت عظمیٰ سے مستعفی ہونے کے بعد ملائیشیا کے پانچویں وزیر اعظم بنے تھے۔

سابق وزیر اعظم کے داماد اور سابق وزیر صحت خیری جمال الدین نے انسٹاگرام پوسٹ میں موت کی وجہ بتائے بغیر بتایا کہ سابق وزیر اعظم شام 7بجکر 10 منٹ پر دارالحکومت کوالالمپور کے نیشنل ہارٹ انسٹی ٹیوٹ میں انتقال کر گئے۔

انسٹی ٹیوٹ نے ایک بیان میں کہا کہ عبداللہ کو سانس لینے میں دشواری کے بعد اتوار کے روز نیشنل ہارٹ انسٹی ٹیوٹ میں داخل کرایا گیا تھا اور انہیں فوری طور پر انتہائی نگہداشت میں رکھا گیا تھا۔

مسلم اکثریتی ملک کے وزیر اعظم کی حیثیت سے عبداللہ نے بدعنوانی کے خلاف مہم کا آغاز کیا اور اسلام کے اعتدال پسند ورژن کی حمایت کی جس کا مقصد معاشی اور تکنیکی ترقی تھا۔