صدر ابراہیم رئیسی کی پاکستان میں بزدلانہ دہشت گردانہ حملے کی مذمت

صدر ایران نے دہشت گردانہ حملے میں دسیوں پاکستانی شہریوں کے جاں بحق ہونے کے بعد ایک پیغام میں پاکستان کی حکومت اور قوم کو تعزیت پیش کی ہے۔

آيت اللہ سید ابراہیم رئیسی نے اتوار کے روز، جمیعت علمائے اسلام کے اجتماع میں دہشت گردانہ بم دھماکے پر پاکستان کے وزیر اعظم شہباز شریف کو ایک پیغام میں اس ملک کی حکومت اور قوم کو تعزیت پیش کی ہے۔

صدر مملکت نے اس پیغام میں لکھا ہے: میں، ایرانی قوم کی طرف سے آپ کو اور دوست و برادر ملک پاکستان کے عوام کو تعزیت پیش کرتا ہوں اور اس بزدلانہ دہشت گردانہ حملے کی مذمت کرتا ہوں اور ہمیں یہ یقین ہے کہ اس قسم کے غیر انسانی و مجرمانہ عمل کا نتیجہ، اسے انجام اور اس کا حکم دینے والوں کے لئے ذلت کے علاوہ کچھ نہيں نکلے  گا۔

پاکستان کے باجوڑ میں جمعیت علمائے اسلام کے پروگرام میں بم دھماکے کے بعد اسلامی جمہوریہ ایران کے وزير خارجہ حسین امیر عبد اللھیان نے بھی ایک ٹویٹ کرکے اس دہشت گردانہ حملے کی مذمت کی ہے۔

وزیر خارجہ نے ٹویٹ کیا:  ہم پاکستان کے باجوڑ میں دہشت گردانہ حملے کی شدید مذمت کرتے ہيں اور اپنے ہم منصب بلاول بھٹو زرداری، پاکستان کی حکومت اور قوم نیز متاثرین کی خدمت میں تعزیت پیش کرتے ہیں ۔ دہشت گردی و شدت پسندی کے خلاف موثر جنگ، دونوں ملکوں کا مشترکہ مشن ہے۔ دہشت گردی عصر حاضر کی بدترین لعنت ہے۔

اس سے پہلے ترجمان وزارت خارجہ نے بھی  پاکستان  کے باجوڑ میں جمعیت علمائے اسلام کے ورکرز کنونشن میں دھماکے پر ایران کی حکومت اور عوام کی جانب سے پاکستان کی حکومت اور عوام کو تعزیت پیش کی تھی اور اس دہشت گردانہ  حملے کی شدید الفاظ میں مذمت کی ہے جس میں بہت سے بے گناہ شہری جاں بحق ہوئے ہيں۔ 

ترجمان وزارت خارجہ ناصر کنعانی نے اتوار کے روز اپنے بیان میں کہا: آج ایک بار پھر دہشت گردوں نے ایک اور جرم کا ارتکاب کرتے ہوئے ہمارے پڑوسی و برادر ملک پاکستان میں بہت سے گھرانوں کو سوگوار کر دیا۔ اسلامی جمہوریہ ایران، جمہوریہ اسلامی پاکستان کے ساتھ کھڑا ہے اور اس دہشت گردانہ حملے سے متاثرہ گھرانوں کو تعزیت پیش کرتا ہے اور زخمیوں کے لئے شفائے عاجل کی دعا کرتا ہے ۔