افغانستان میں صدارت کے عہدے پر تنازعہ برقرار

افغانستان میں صدارت کے دعوے داروں کے درمیان اختلافات بدستور باقی ہیں اور عبداللہ عبداللہ نے اشرف غنی کی پیشکش مسترد کردی ہے۔
اشرف غنی نے افغان پارلیمنٹ کے ارکان کے ساتھ ملاقات میں عبداللہ عبداللہ سے کہا تھا کہ وہ ملک کی اعلی امن کونسل کی صدارت سنبھال لیں۔ اشرف غنی نے افغانستان کی موجودہ صورتحال اور کورونا کے بحران کا ذکر کرتے ہوئے کہا کہ دو سر والی حکومت ملکی انتظام، امن اور بحران کے بارے میں فیصلے نہیں کر سکتی، لہذا ہمیں اتحاد کے ذریعے معاملات کو آگے بڑھانا ہو گا۔ 
دوسری جانب عبداللہ عبداللہ کی انتخابی ٹیم کے ایک رکن نور رحمان اخلاقی نے کہا ہے کہ اشرف غنی کی پیشکش قابل قبول نہیں۔ انہوں نے کہا کہ اشرف غنی کی کوئی قانونی حیثیت نہیں ہے اور وہ ایسی کوئی بھی پیشکش کرنے کے مجاز نہیں۔ 
 قابل ذکر ہے کہ عبداللہ عبداللہ اور اشرف غنی نے بیک وقت دو الگ الگ تقریبات کے دوران عہدۂ صدارت کا حلف اٹھایا تھا۔ اندرونی اور بیرونی سطح پر انجام پانے والی ثالثی کی کوششوں کے باوجود دونوں کے درمیان مسائل جوں کے توں باقی ہیں۔