مریکی تاریخ کی سب سے بڑی ملک بدری مہم شروع

امریکا نے کہا ہے کہ وہ لاکھوں تارکین وطن کی قانونی حیثیت ختم کر رہا ہے اور انہیں ملک چھوڑنے کے لیے ہفتوں کا وقت دے رہا ہے۔

صدر ڈونلڈ ٹرمپ نے امریکی تاریخ کی سب سے بڑی ملک بدری مہم چلانے اور خاص طور پر لاطینی امریکی ممالک سے امیگریشن کو روکنے کا وعدہ کیا ہے۔

اس حکم نامے سے کیوبا، ہیٹی، نکاراگوا اور وینزویلا کے تقریباً 5 لاکھ 32 ہزار شہری متاثر ہوں گے، جو ٹرمپ کے پیش رو جو بائیڈن کی جانب سے اکتوبر 2022 میں شروع کی گئی اسکیم کے تحت امریکا آئے تھے، اور اگلے سال جنوری میں اس میں توسیع کی گئی تھی۔

ہوم لینڈ سیکیورٹی ڈپارٹمنٹ کا حکم فیڈرل رجسٹر میں شائع ہونے کے 30 دن بعد وہ اپنے قانونی تحفظ سے محروم ہو جائیں گے۔

حکم نامے میں کہا گیا ہے کہ اس پروگرام کے تحت اسپانسر کیے جانے والے تارکین وطن کو 24 اپریل تک امریکا چھوڑنا ہوگا، جب تک کہ انہوں نے ایک اور امیگریشن اسٹیٹس حاصل نہ کر لیا ہو، تاکہ وہ ملک میں رہ سکیں۔

امریکا میں پناہ لینے والے افراد کی مدد کرنے والے Welcome.US نے اس اقدام سے متاثر ہونے والے افراد پر زور دیا ہے کہ وہ فوری طور پر امیگریشن کے وکیل سے مشورہ لیں۔

جنوری 2023 میں اعلان کردہ کیوبا، ہیٹی، نکاراگوا اور وینزویلا کے شہریوں (سی ایچ این وی) پروگرام کے تحت ان 4 ممالک سے ہر ماہ 30 ہزار تارکین وطن کو 2 سال کے لیے امریکا میں داخلے کی اجازت دی گئی تھی.

بائیڈن نے اس منصوبے کو امریکا اور میکسیکو کی سرحد پر دباؤ کم کرنے کا ایک ’محفوظ اور انسانی‘ طریقہ قرار دیا۔

تاہم ہوم لینڈ سیکیورٹی ڈپارٹمنٹ نے زور دے کر کہا کہ یہ اسکیم ’عارضی‘ ہے۔

حکم نامے میں کہا گیا ہے کہ پیرول فطری طور پر عارضی ہے اور صرف پیرول امیگریشن اسٹیٹس حاصل کرنے کی بنیادی بنیاد نہیں اور نہ ہی یہ امریکا میں داخلے کے زمرے میں آتا ہے۔

ٹرمپ نے گزشتہ ہفتے وینزویلا کے ایک گینگ کے 200 سے زائد مبینہ ارکان کو ایل سلواڈور بھیجنے کے لیے جنگ کے دوران کی نایاب قانون سازی کا استعمال کیا تھا۔