یمنی فوج نے چوتھے امریکی ڈرون کو مار گرایا

یمنی مسلح افواج کے ترجمان نے یمن میں ایک امریکی ڈرون کو مار گرانے کا اعلان کیا ہے۔

یمنی مسلح افواج کے ترجمان یحیی سریع نے ایک بیان میں اعلان کیا ہے کہ ملک کا فضائی دفاع گزشتہ رات امریکی ایم کیو 9 ڈرون کو مار گرانے میں کامیاب ہو گیا ہے۔

انہوں نے کہا کہ یہ ڈرون یمن کے صوبہ مارب کی فضائی حدود میں دشمنی کی کارروائیاں کر رہا تھا۔

یحییٰ سریع نے زور دے کر کہا: "غزہ کی حمایت میں وعدہ فتح جنگ اور مقدس جہاد کے آغاز کے بعد سے یہ چوتھا ڈرون ہے جسے ہم نے مار گرایا ہے۔"

یمنی مسلح افواج کے ترجمان نے کہا کہ اس امریکی ڈرون کو مقامی طور پر تیار کردہ زمین سے فضا میں مار کرنے والے میزائل سے نشانہ بنایا گیا اور اس کارروائی کی ویڈیوز جاری کی جائیں گی۔

آخر میں انہوں نے اس بات پر زور دیا کہ یمنی مسلح افواج زمینی، سمندری اور فضائی تمام سطحوں پر پوری طرح تیار ہیں اور دشمن کی تمام کوششوں کو ناکام بنایا جائے گا۔