لاس اینجلس آگ اور ہوا کے قہر کی زد میں

لاس اینجلس میں چند گھنٹوں بعد تیز ہوائيں چلنے کی پیشگوئی نے ہلچل مچا دی ہے، آگ لاس اینجلس سے باہر دیگر شہروں تک پھیلنے کی وارننگ جاری کردی گئی ہے۔

امریکی نشریاتی ادارے سی این این کے مطابق لاس اینجلس میں تیز ہوائیں چلنے کے نتیجے میں ساٹھ لاکھ امریکیوں کو ’شدید آگ‘ کے خطرات کا سامنا ہے، لاس اینجلس کے قریبی دیگر شہروں تک بھی یہ آگ پھیل سکتی ہے۔

لاس اینجلس کے جنگل میں لگی آگ پھیلنے کے بعد سے اب تک پچیس افراد ہلاک ہوچکے ہیں-محکمہ موسمیات اور ماہرین کے مطابق تیز ہوائیں آگ کی شدت کم نہیں ہونے دے رہی ہیں، دو دن سے ہوائیں بند ہونے کی وجہ سے آگ کی شدت کم ہوگئی تھی، تاہم آج بدھ کو اب سے چند گھنٹے بعد لاس اینجلس کی آگ اب دوسرے قریبی شہروں تک پھیلنے کی پیشگوئی نے خطرے کی گھنٹی بجا دی ہے۔

لاس اینجلس کی انتظامیہ کو آگ بجھانے والے عملے کی شدید کمی کا بھی سامنا ہے۔ واضح رہے کہ ایک ہفتے سے امریکی ریاست کیلیفورنیا کے شہر لاس اینجلس کے جنگل میں لگنے والی آگ پھیلنے کے نتیجے میں اب تک 12 ہزار تین سو سے زیادہ گھر مکمل تباہ ہوچکے ہیں، جبکہ ڈھائی ارب سے پونے تین ارب امریکی ڈالر کے مالی نقصان کا تخمینہ لگایا گیا ہے۔

ہزاروں امدادی کارکن اور جیلوں کے قیدیوں کو آگ بجھانے کے لیے تعینات کیا گیا ہے، تاہم شہر کی تاریخ کی بد ترین آگ بجھنے کا نام نہیں لے رہی۔